Խաչքարը աշխարհի կողմերի հանդեպ հստակ կողմնորոշումով բացօթյա կանգնած ուղղաձիգ տափակ մի սալ է, որի արևմտահայաց լայն կողը զբաղեցնում է բուսական-երկրաչափական, կենդանիների ու թռչունների, երբեմն էլ մարդկանց քանդակներով ուղեկցվող քանդակազարդ խաչը:
Խաչքարը հայ մշակույթի ինքնատիպ զարգացման արգասիքն ու ցուցիչն է, հայ ինքնության ամենաբնութագրական խորհրդանշաններից մեկը: Իր զարմանահրաշ քանդակներով, խաչի փրկագործական խորհրդաբանությամբ և քարի հավերժություն ներշնչող մշտականությամբ այն եղել է հայ ժողովրդի ամենաակնածելի, իսկ բազմաքանակությամբ և բացօթյա տեղադրությամբ` նաև ամենամատչելի սրբություններից մեկը: Ավելի քան հազարամյա ճանապարհ անցնելով` այն նաև արդիական մշակութային դրսևորում է, քանի որ այսօր էլ Հայաստանում կերտվում են հարյուրավոր խաչքարեր:
Այս ամենով հանդերձ խաչքարերը քիչ են ծանոթ աշխարհին: Ինչ վերաբերում է նրա հորինվածքի իմաստաբանությանն ու խորհրդաբանությանը, ապա այն շատերի համար մնում է չբացահայտված: Այս կայքի նպատակն է ներկայացնել այդ յուրօրինակ մշակույթը, փորձել բացահայտել նրա ծագումը, զարգացման օրինաչափությունները, գործառույթը, քանդակների ու զարդերի իմաստն ու խորհուրդը: Երկրորդ կարևոր նպատակն այդ կոթողների պահպանությունն է, դրանց հանդեպ հոգատար վերաբերմունքի ձևավորումը: Եվ վերջապես կայքը նպատակ ունի սերտ կապեր ու մտքերի փոխանակություն իրականացնել բոլոր հաստատութոյւնների ու անձանց միջև, ովքեր հետազոտում են, ստեղծում են, հետքրքրվում են, կամ ուղղակի սիրում են խաչքարը:
Գլխավոր էջ 
Խաչքարը աշխարհի կողմերի հանդեպ հստակ կողմնորոշումով բացօթյա կանգնած ուղղաձիգ տափակ մի սալ է, որի արևմտահայաց լայն կողը զբաղեցնում է բուսական-երկրաչափական, կենդանիների ու թռչունների, երբեմն էլ մարդկանց քանդակներով ուղեկցվող քանդակազարդ խաչը: 
